کوئٹہ ۔31 مئی (اے پی پی) وزیراعظم محمد شہبازشریف آکھیے جو پاکستان نہ صرف بھارت کوں جنگ اچ ہرائے بلکہ سفارتی سطح تے وی منہ دی کھاوݨی پئی اے ،بھارت کوں پاݨی کوں بطور ہتھیار استعمال کرݨ دی ہرگز اجازت نہ ݙیسوں ۔آئی ایم ایف دے نال کامیاب معاہدے نال ملکی معیشت کوں استحکام ملئے ،پاکستان دی معاشی استحکام سانگے اصلاحات ناگزیر ہن ،موجودہ حکومت کرپشن دے خلاف زیرو ٹالرنس پالیسی اپنائی اے ،مہانگ دی شرح 38فیصد توں گھٹ تھی تے سنگل ڈیجٹ تئیں آڳئی اے ،جدت کوں اپنا تے کرپٹو اتے بلاک چین ??یکنالوجی دااجراء کریندے پیوں، وفاقی حکومت دی توجہ معیشت ،اصلاحات اتے انسداد دہشتگردی تے مرکوز اے ،چین ،سعودی عرب ،ترکیہ ،قطر اتے خلیجی ملک بہترین دوست ہن جنہاں اوکھے ویلھے اچ بھرپور ساتھ ݙتے، عظیم اقوام اچ شامل تھیوݨ سانگے سخت محنت کرݨی ہوسی ۔انہاں اے ڳالھ کمانڈ اینڈ اسٹاف کالج کوئٹہ اچ افسران نال خطاب کریندے آکھئن۔ایں موقع تے فیلڈ مارشل سید عاصم منیر،وزیراعلی بلوچستان میرسرفراز بگٹی ،وفاقی وزراء احسن اقبال ،عطا اللہ تارڑ،کورکمانڈر بلوچستان لیفٹیننٹ جنرل راحت نسیم احمد خان ،ڈی جی آئی ایس پی آراحمد شریف چوہدری اتے بئے وی موجود ہن ۔وزیراعظم شہبازشریف آکھیے جو کمانڈ اینڈ سٹاف کالج ہمیشہ شاندار خدمات سرانجام ݙتن،کمانڈ اینڈ اسٹاف کالج اچ مختلف ملکاں توں آئے مہماناں کوں خوش آمدید آکھدوں، مہماناں دی آمد اتے اتھاں موجودگی اساݙے بہترین تعلقات دی عکاس اے ۔انہاں آکھیا جو اڄ عام محاذ دے بجائے مختلف جہتاں اچ صلاحیتاں دا امتحان اے ۔انہاں آکھیا جو پہلگام واقعے دی آڑ اچ بھارت ولوں کیتے ڳئے اقداماں دا بھرپور جواب ݙتا ڳیا ۔بھارت جارحیت کریندے ہوئیں نشوم شہریاں کوں نشانہ بݨائے اتے جواب اچ پاکستان ائیرفورس تاریخی کارنامہ سرانجام ݙیندے ہوئیں 7ہائی ویلیو ٹارگٹ کوں نشانہ بݨائے،اساݙیاں مسلح افواج بہترین خدمات سرانجام ݙتیاں اتے ایں ادارے فرائض دی انجام ݙیوݨ اچ کوئی کسر کائنی چھوڑی ،پہلگام واقعے دی غیر جانبدارانہ تحقیقات دے بجائے بھارت ولوں الزام تراشی شروع کیتی ڳئی اتے پاکستان دے خلاف جارحیت کیتی ڳئی ۔بھارت ہک واری ول پروپیگنڈا کھنڈاوݨ دی کوشش کیتی ۔وزیراعظم آکھیے جو فیلڈ مارشل سید عاصم منیر ولوں ݙسایا ڳیا ہئی جو اساں ہر قسم دی جنگ سانڳے مکمل طور تے تیارہیسے،انہاں آکھیے جو پاکستان کوں فیلڈ مارشل سید عاصم منیر دی پیشہ وارانہ صلاحیتاں پاروں نہ صرف تاریخی کامیابی ملی بلکہ پاکستان بھارت کوں زمین اتے فضاء توں بھرپور جواب ݙیندے ہوئیں ایندے میزائل ڈیفنس سسٹم کوں نشانہ بݨائے، ائیرچیف مارشل ظہیر احمد بابر وی پروفیشنلزم دی ہک عمدہ مثال قائم کیتی ۔انہاں آکھیے جو حکومت اتے عوام آپݨیاں مسلح افواج دے رلے ہن اتے اللہ تعالی اساکوں شاندار فتح نال نوازیے، خطے اچ امن وامان اتے خوشحالی سانگے سیز فائرکیتا ،پاکستان نہ صرف بھارت کوں جنگ اچ ہرائے بلکہ سفارتی سطح تے وی بھارت کوں منہ دی کھاوݨی پئی ،بھارت ولوں آئندہ وی کوئی مہم جوئی تھئی تاں ایندا منہ تروڑ جواب ݙتا ویسی ۔انہاں آکھیا جو مسلح افواج پاکستان دی خودمختاری اتے سالمیت دیاں محافظ ہن بلکہ اڄوکی کشیدگی دے بعد اساݙیاں افواج اتے قوم دا مورال مزید اُچا تھئے ۔وزیراعظم آکھیا جو بھارت پاݨی کوں بطور ہتھیار استعمال کریندا پئے لیکن بھارت کوں پاݨی کوں بطور ہتھیار استعمال کرݨ دی اجازت کہیں صورت نہ ݙیسوں،پاݨی اساݙے سانگے ریڈ لائن اے ۔انہاں آکھیا جو پاکستان کوں ݙوچار خطرات صرف روایتی میدان جنگ تئیں محدود کائناں ہن ۔انہاں ٻئے چیلنجز دا ذکر کریندے ہوئیں آکھیا جو جݙݨ م??ں 16مہینے دی مدت سانگے وزارت عظمی دی کرسی سنبھالی تاں حالات اوکھے ہن ??یکن ناممکن کائناں ہن،انہاں آکھیا جو اساکوں بحیثیت قوم ایں لمحے دا فیدہ چیندے ہوئیں اڳوں ودھݨ دی لوڑھ اے ۔انہاں آکھیا جو آئی ایم ایف دے نال کامیاب معاہدے نال ملکی معیشت کوں استحکام ملئے پاکستان دی ترقی سانگے ضروری اے جو معاشی استحکام سانگے بنیادی سطح تے اصلاحات کیتیاں ونڄن اتے عظیم قوماں اچ آپݨاں ناں شامل کرݨ سانگے سخت محنت شرط اے ۔انہاں آکھیا جو موجودہ حکومت کرپشن دے خلاف زیرو ٹالرنس پالیسی اپنائی اے ،حکومت ہر محاذ تے عظیم کامیابیاں سمیٹئن، مارچ 2024 اچ اصلاحات دا آغاز کیتا گزریل سال دے مقابلے اچ موجودہ محصولات 28فیصد ودھ ہن جیڑھی وݙی کامیابی اے ،کراچی بندرگاہ تے فیس لیس اسسسمنٹ سسٹم رائج کیتا ڳئے معاشی بہتری نال عام بندے دی زندگی اچ بہتری آئی اے بلکہ مہانگ دی شرح 38فیصد توں گھٹ تھی تے سنگل ڈیجٹ تئیں آڳئی اے اتے پاکستانی روپیہ مستحکم تھئے ۔انہاں آکھیا جو آپݨی محنت نال خطہ ارض کوں دنیا سانڳے مثالی بݨیسوں کیوں جو محنت او گوہر نایاب اے جیں نال کامیابی ملدی اے ،اساں اوکھے فیصلے ڳھدے ۔معیشت دی بہتری سانگے حکومت اسمگلنگ تے قابو پا تے معاشی نظام کوں مستحکم بݨائے، بجلی دی چوری دا خاتمہ یقینی بݨایا ڳئے ۔انہاں آکھیا جوݙوچار چیلنجز نال آہنی عزم دے نال نبڑسوں بلکہ جدت کوں اپنا تے کرپٹو اتے بلاک چین ??یکنالوجی دا اجرا کریندے پیوں ۔وفاقی حکومت دی معیشت ،اصلاحات اتے انسداد دہشتگردی تے توجہ مرکوز اے ،سعودی عرب پاکستان دا بہترین دوست اے ،خلیجی ملکاں دے نال پاکستان دے بہترین تعلقات ہن ۔چین دے نال دوستی ہر آزمائش تے پوری لتھی اے ،ترکیہ ،قطر اتے ٻئے دوست ملک اوکھے ویلھے اچ بھرپور ساتھ ݙتا۔
