اسلام آباد – 14 – آڪٽوبر (اي پي پي) وزيراعظم محمد شهباز شريف ۽ چين جي وزيراعظم لي چيانگ نيو گوادر ايئرپورٽ جو ورچوئل افتتاح ڪندي قرار ڏنو آهي ته گوادر نه رڳو علائقائي ترقي جو محور پر پاڪستان جي لاءِ گيم چينجر جي حيثيت رکي ٿو، گڏيل مستقبل ۽ گهڻ رُخي ترقي جي لاءِ اسان جو عزم مضبوط آهي. اهڙن خيالن جو اظهار هن وزيراعظم هائوس ۾ نيو گوادر انٽرنيشنل ايئرپورٽ جي تڪميل جي ورچوئل تقريب کي خطاب ڪندي ڪيو.
وزيراعظم محمد شهباز شريف چيو ته پاڪستان ۽ چين جي وچ ۾ صنعت، زراعت ۽ واپار سميت مختلف شعبن ۾ يادداشتن تي صحيحون ڪيون ويون آهن، اهي ٻطرفا معاهدا ٻنهي دوست ملڪن جي وچ ۾ نئين باب جو اضافو آهي، چيني وزيراعظم جي پاڪستان جي دوري تي سندس ٿورائتا آهيون، سندس دورو ٻنهي ملڪن جي وچ ۾ دوستي جي فروغ جي عزم جو ورجاءُ آهي، اسان ملاقات دوران لاڀائتي ۽ تعميري ڳالهه ٻولهه ڪئي. هن چيو ته پاڪستان جي ترقي جي لاءِ چين جي پختي عزم جا معترف آهيون، صدر شي جن پنگ، چيني عوام جو گوادر ايئرپورٽ جو تحفو ڏيڻ تي ٿورائتا آهيون، پاڪستان جي معاشي ترقي جي ايجنڊا ۽ پٺتي پيل علائقن جي ترقي سميت ٻين شعبن ۾ تعاون تي ٿورائتا آهيون، گوادر ايئرپورٽ سان نه رڳو گوادر پر پورو ملڪ ترقي ڪندو، سي پيڪ تحت ان منصوبي کي مڪمل ڪيو ويو، يقين ڏياريان ٿو ته نه رڳو سي پيڪ جي ٻئي مرحلي تي عملدرآمد پر چين ۽ پاڪستان جي عوام جي امن ۽ سلامتي جي لاءِ توهان سان گڏجي ڪم ڪندس.
هن چيو ته گوادر ايئرپورٽ جي تڪميل جي لاءِ چيني ۽ پاڪستاني انجنيئرز ۽ ورڪرز جي اڻٿڪ ڪوششن سان اهو عالمي معيار جو منصوبو مڪمل ٿيو، چين پاران پاڪستان جي لاءِ اهو يادگار تحفو سدائين ياد رهندو. ان موقعي تي منصوبابندي ۽ ترقي واري وفاقي وزير احسن اقبال پڻ خطاب ڪيو.
