لاہور۔5جون(اے پی پی)وزیر اعظم محمد شہباز شریف آکھیے جو قوماں محنت ‘صف بندی اتے پلاننگ نال ٻݨدن، ملک کوں اڳو تے ودھݨ کیتے گرینڈ ڈائیلاگ کرݨا ہوسی، صحت و تعلیم تے کوئی سمجھوتا نئیں تھیوݨا چاہیدا، آئی ٹی اتے ٻئے کئی شعبیاں اچ پاکستان اگو تے ودھ سڳدے، معیشت تکڑی کرݨ کیتے رڄ محنت کریسوں، چنڳے لوک کہیں وی حکومت نال کم کرݨ ایکوں سیاسی رنگ نئیں ݙیوݨا چاہیدا۔ اے ڳالھ انہاں لاہور اچ انڈس ہسپتال دی افتتاحی تقریب نال خطاب کریندے آکھی۔ انہاں آکھیا جو ساکوں پسند ناپسند توں ہٹ تے ذاتی انا مار تے صرف ملکی مفاد اتے قوم دی ترقی و خوشحالی کیتے کم کرݨا ہوسی۔ انہاں آکھیا جو قوم دی ݙکھ درد دا احساس اے ٻھل دل تے وٹا رکھ تے قیمتاں ودھائن، پوری کوشش کریساں جو غریب شہریاں تے ٻھار نا پووے۔ انہاں آکھیا گرینڈ ڈائیلاگ کیتے ترقی نال جڑیے سارے شعبیاں اتے فریقاں نال صلاح مشورہ کرݨا ہوسی جو مل جل تے ملک کوں اڳو تے ودھاووں اتے صحت، تعلیم، صنعت و زراعت دی ترقی تھیوے، معیشت سنبھلے۔
