لاہور۔8اکتوبر (اے پی پی) وزیراعلی پنجاب سردار عثمان بز دار آکھیا جو شان رحمت اللعالمین بیان کرݨ دا حڳ ادا کرݨ کیتے نہ کوئی قلم اتے نہ کوئی زبان، نبی آخرالزماں حضرت محمد ﷺ دی تعریف تےتوصیف بیان کرݨ ٻہوں وݙا اعزاز اتے انعام اے۔ ہر مسلمان حضرت محمد ﷺ دی شان بیان کرݨ آپݨے کیتے سعادت سمجھدے۔ پچھلی روایت کوں اڳوں ودھیندیں ہوئیں شان رحمت اللعالمین بیان کرݨ کیتے پورا عشرہ مخصوص کیتے۔ 12 ݙینھ دی تقریبات حضرت محمد ﷺ دی شان بیان کرݨ کیتے کافی کائنی پر اساں دنیا کوں ݙساوݨ چاہندوں جو اساں دل و جان نال حضرت محمد ﷺ تے فدا ہیسے اتے انہاں دی عظمت کہیں وی دنیاوی امر توں اُتے کائنی۔ پنجاب اچ پہلی توں 12ربیع الاول تئیں عشرہ شان رحمت اللعالمین منایا ویسی، خصوصی تقریباں،محفلیاں تھیسن۔ او جمعے کوں 8کلب ایوان وزیر اعلی اچ عشرہ شان رحمت اللعالمین مناوݨ بارے پریس کانفرنس توں خطاب کریندے پئے ہن۔ ایں موقع تے صوبائی وزرا راجہ بشارت، پیر سید سعیدالحسن شاہ، راجہ یاسر ہمایوں، مراد راس، معاون خصوصی اطلاعات حسان خاور، پرنسپل سیکرٹری وزیراعلی، سیکرٹری اوقاف، سیکرٹری ہائر ایجوکیشن، سیکرٹری سکول ایجوکیشن اتے متعلقہ حکام وی موجود ہن۔
