اسلام آباد۔10جنوری(اے پی پی) سعودی حکومت پاکستان دا پراݨا حج کوٹہ بحال کرݙتے، اڄوکے سال ھک لکھ 79 ہزار 210 پاکستانی حج پڑھسن۔ سعودی حکومت عازمین حج کیتے عمر دی حد وی ختم کرݙتی اے ۔ وزارت مذہبی امور دے ترجمان آکھیے وزیر مذہبی امور مفتی عبدالشکور سعودی عرب دی دعوت تے 4 ݙینھ دی عالمی حج کانفرنس اچ شرکت کیتے جدہ وچ ہن ۔ کانفرنس دے شرکاء کوں سعودی ویژن 2030 دی روشنی اچ جدید حج انتظامات تے سہولتاں تے بریفنگ ݙتی ڳئی اے مفتی عبدالشکور دی سعودی ہم منصب ڈاکٹر توفیق بن فوزان الربیعہ سودھے کئی اہم شخصیات نال ملاقاتاں تھئن ۔ انہاں دے رلے سیکرٹری مذہبی امور ڈاکٹر آفتاب اکبر درانی، سعودی سفیر نواف سعید المالکی، ڈائریکٹر حج ساجد اسدی اتے نجی حج سکیم کی نمائندہ تنظیم ہوپ دے عہدےدار وی موجود ہن ۔ تفصیلات موجب سعودی حکام دی طرفوں وزیر مذہبی امور کوں سالانہ حج معاہدے دا مسودہ مل ڳئے جیں دے تحت پاکستانی حجاج دا پراݨا کوٹہ 179210 بحال کرݙتا ڳئے تے 65 سال دی اتلی حد کوں وی ختم کرݙتا ڳئے ۔وزیر مذہبی امور سعودی حکام توں درخواست کیتی اے جو لازمی حج خرچیں کوں مزید گھٹایا ونڄے تاں جو حج دے خواہشمند پاکستانی عازمین تے گھٹ توں گھٹ ٻوجھ پووے جیں تے سعودی وزیر حج و عمرہ مثبت کوشش دا یقین ݙیوائے۔ واضح رہے امسال حج درخواستاں فروری دے چھیکڑ تئیں ڳھدے ونڄݨ دا امکان اے ۔ کابینہ دی منظوری توں بعد وفاقی وزیر مذہبی امور حتمی حج پالیسی 2023 دا اعلان کریسن۔
