اسلام آباد – 19 – آگسٽ (اي پي پي) وزيراعظم محمد شهباز شريف چيو آهي ته پوليو کان پاڪ پاڪستان قومي مقصد آهي، قوم ملڪ مان پوليو جي خاتمي لاءِ پوليو ٽيمن سان تعاون ڪري. هن اهڙن خيالن جو اظهار هن پوليو جي خاتمي بابت قومي ٽاسڪ فورس جي اجلاس جي صدارت ڪندي ڪيو. وزيراعظم چيو ته پوليو فري پاڪستان قومي مقصد آهي، پوري قوم کي اپيل ڪريان ٿو ته اها ملڪ مان پوليو جي مڪمل خاتمي لاءِ پوليو ٽيمن سان تعاون ڪري. پوري قوم ڊيوٽي دوران شهيد ٿيندڙ فوجين، پوليس ڪانسٽيبلز ۽ پوليو ورڪرز کي خراج عقيدت پيش ڪري ٿي. وزيراعظم پاڪستان ۾ پوليو وائرس جو ڦهلاءُ روڪڻ جي لاءِ عملي قدم کڻڻ جي لاءِ پنهنجي حڪومت جي مڪمل عزم جو اظهار ڪيو. وزيراعظم چيو ته موجوده موسمي حالتون ويڪسي نيشن مهم جي لاءِ وڏي چئلينجز جو سبب آهن پر اهو ڏسڻ ساراهه جوڳو آهي ته خيبرپختونخواهه جي مختلف علائقن ۾ ٻوڏ ۽ ڪراچي ۾ طوفاني برساتن جي باوجود پوليو ٽيمن ڀرپور ڪم ڪيو آهي. ڪراچي ۽ ڏکڻ خيبرپختونخواهه جي 6 ضلعن ۾ پوليو جي خاتمي جي موجوده مهم 15 آگسٽ کان شروع ٿي هئي جڏهن ته ملڪ جي ٻين علائقن ۾ پوليو ويڪسي نيشن مهم 22 آگسٽ کان شروع ٿيندي. وزيراعظم چيو ته تازن پوليو ڪيسز ۽ سيڪيورٽي جي ڏس ۾ واقعا هي هڪ آزمائش جو وقت آهي، پر اهو هڪ چئلينج آهي جنهن تي اسان ضابطو آڻي سگهون ٿا ۽ آڻي وٺنداسين. وزيراعظم چيو ته تمام وڌيڪ ڏکين چئلينجن وارن ملڪن به پوليو جو خاتمو ڪري ڇڏيو آهي ۽ مون کي ڪو سبب نظر نه ٿو اچي ته پاڪستان ان تي ضابطو نه آڻي سگهي. وزيراعظم چيو ته سموريون صوبائي حڪومتون ان ڳالهه کي يقيني بڻائين ته انهن وٽ سڀ کان وڌيڪ چئلينج وارن علائقن ۾ بهترين ماڻهو موجود هجن. هن چيو ته سڄي ملڪ ۾ پوليو ٽيمن سان تعاون ڪرڻ تي سمورن قانون لاڳو ڪندڙ ادارن خاص طور تي پاڪ فوج ۽ پوليس جا ٿورا مڃان ٿو، ڪيترن ئي آفيسرن ۽ پوليو ورڪرز فرضن جي ادائيگي دوران پنهنجون جانيون قربان ڪيون. وزيراعظم عالمي امدادي ادارن ۽ حصيدارن خاص طور تي بل اينڊ ملينڊا گيٽس فائونڊيشن جا به ٿورا مڃيا جيڪي پاڪستان ۾ پوليو وائرس جي ڦهلاءُ کي روڪڻ جي لاءِ مسلسل پاڪستان جي مدد ڪري رهيا آهن. واضح رهي ته وزيراعظم جي صدارت ۾ ٿيندڙ پوليو بابت قومي ٽاسڪ فورس جو هي ٽيون اجلاس آهي. اپريل ۾ هلندڙ سال جو پهريون پوليو ڪيس سامهون اچڻ کان فوري پوءِ وزيراعظم شهباز شريف سمورن هائي رسڪ علائقن جي ڊپٽي ڪمشنرز جي هنگامي اجلاس جي صدارت ڪئي جنهن ۾ موجوده چئلينجز تي خيالن جي ڏي وٺ ۽ انهن کي منهن ڏيڻ جي لاءِ قدمن تي غور ڪيو ويو. وزيراعظم ۽ ٻين شرڪت ڪندڙن اڱاري ڏينهن ٽانڪ ۾ شهيد ٿيندڙ پوليس ڪانسٽيبلز ۽ جوانن جي لاءِ فاتحه خواني ڪئي. ان کان اڳ وزيراعظم شهباز شريف چيو ته پوليو کان پاڪ پاڪستان اسان جو قومي مقصد آهي، بدقسمتي سان پاڪستان انهن ڪجهه ملڪن ۾ شامل آهي جتي پوليو جا مريض اڃا تائين موجود آهن، وفاقي ۽ صوبائي حڪومتن کي پوليو جي خاتمي لاءِ گڏيل مشن طور قدم کڻڻ گهرجن. وزيراعظم چيو ته والدين کي اپيل آهي ته اهي پوليو ٽيمن سان تعاون ڪن، پوليو کان پاڪ پاڪستان اسان جو قومي مقصد آهي، ٻوڏ جي ڪري ملڪ جي ڪيترن ئي علائقن تائين پهچ ڪٽجي وئي آهي ان لاءِ پوليو جي خلاف مهم هڪ چئلينج بڻجي چڪي آهي. هن چيو ته پوليو جي خالف مهم ۾ ڪنهن به قسم جي سُستي نه ٿيڻ گهرجي، اسان عالمي حصيدارن خاص طور تي بل اينڊ ملينڊا گيٽس فائونڊيشن جي تعاون جا ٿورائتا آهيون. ٻئي طرف وزيراعظم ٻارن کي پوليو جا ڦڙا پياري پوليو جي خاتمي جي مهم شروع ڪرڻ جي موقعي تي چيو ته وفاق ۽ صوبا گڏجي پوليو جهڙي موذي مرض جو خاتمو ڪندا ۽ پنهنجي ٻارن جو مستقبل محفوظ بڻائيندا. وزيراعظم سمورن پوليو ورڪرز ۽ سيڪيورٽي فورسز جي جوانن کي پڻ خراج تحسين پيش ڪيو جيڪي خطرن کي منهن ڏئي ۽ پنهنجي جانين جا نذرانا پيش ڪري پنهنجا فرض سرانجام ڏئي رهيا آهن. وزيراعظم چيو ته پوليو خطرناڪ مرض آهي جيڪو ٻارن کي معذوري ۾ مبتلا ڪري سگهي ٿو، ان لاءِ سمورا والدين پنهنجي 5 سالن تائين جي عمر جي ٻارن کي پوليو جا ڦڙا لازمي پيارين ۽ قوم جي معمارن جو مستقبل ٺاهين. وزيراعظم چيو ته پوري دنيا ۾ پوليو جو خاتمو ٿي چڪو آهي، پاڪستان ۾ به اهو مرض دم ٽوڙي چڪو هو پر بدقسمتي سان ڪجهه علائقن ۾ پوليو جا ڪيس ٻيهر سامهون آيا. وزيراعظم ان عزم جو اظهار ڪيو ته وفاق ۽ صوبا گڏجي پوليو جو خاتمو ڪندا ۽ گڏيل بصيرت ۽ قوت کي استعمال ۾ آڻيندي ٻارن جو مستقبل محفوظ بڻائيندا. وزيراعظم پوليو ورڪرز کي خراج تحسين پيش ڪيو جيڪي پاڪستان جي ڪنڊڪڙڇ ۾ هر قسم جي حالتن ۽ ڏکين علائقن ۾ سموريون رڪاوٽون عبور ڪندي ٻارن کي گهر گهر وڃي پوليو جا ڦڙا پياري رهيا آهن. وزيراعظم پنهنجا فرض سرانجام ڏيڻ دوران پنهنجي جانين جي قرباني ڏيندڙ سيڪيورٽي فورسز جي جوانن کي پڻ خراج عقيدت پيش ڪيو ۽ چيو ته پوري قوم انهن جي قربانين کي سلام پيش ڪري ٿي. وزيراعظم صحت واري وفاقي وزير، سنڌ جي وڏي وزير، سمورن صوبائي حڪومتن بشمول ڪشمير ۽ گلگت بلتستان جا پڻ ٿورا مڃيا ته اهي پوليو جي خلاف مهم ۾ ڀرپور ڪردار ادا ڪري رهيون آهن. هن ان خير جي ڪم ۾ حصو وٺندڙ سمورن ادارن ۽ تنظيمن جا پڻ ٿورا مڃيا. وزيراعظم چيو ته اسان گڏيل ڪوششن کي استعمال ۾ آڻي الله جي فضل ۽ ڪرم سان ان مرض جو خاتمو ڪنداسين.
