اسلام آباد۔9اکتوبر(اے پی پی) نگران وزیراعظم انوارالحق کاکڑ آکھیا جو گورننس دے ڈھانچے،معیشت سودھے اہم قومی موضوعات تے پردیانتدارانہ قومی ڈائیلاگ دی لوڑھ اے، مہانگ تے قابو پاوݨ کیتے وفاق صوبیاں نال رَل تے کم کریندا پئے جئیں دے مثبت نیتجے آوݨ شروع تھی ڳئن۔ پاکستان دے مستقبل بارے ٻہوں امید اے۔ اے ڳالھیں انہاں گزریل رات ڈیجیٹل میڈیا پلیٹ فارم ’’ٹاک شاک ‘‘کوں ݙتے ڳئے انٹرویو اچ آکھی۔ نگران وزیراعظم انوار الحق کاکڑ داخلہ تے خارجہ معاملے ، تنازعہ فلسطین ، مسئلہ کشمیر سودھے اہم معاملیاں تے ڳالھ کیتی۔ ہک سوال دے ولدے اچ انہاں آکھیا جو پاکستان کوں ایں ویلھے معاشی، سیاسی اتے ٻئے چیلنجز ہن ایں کیتے قوم دی حیثیت نال اساں ساریاں کوں کردار ادا کرݨا پوسی۔ انہاں زور ݙتا جو گورنس دے سٹرکچر ، سیاسی رویہ ، مذہب اتے سیاست ، معیشت اتے سیاست اتے عدلیہ دے نظام سودھے اہم معاملیاں تے دیانتدارانہ اتے کھلے ڈائیلاگ دی لوڑھ اے۔ ایں بارے پارلیمان کردار ادا کر سڳدی اے۔ توقع اے جو آوݨ آلی پارلیمان ایں تے کم کریسی۔ انہاں آکھیا جو ملک اچ کہیں قسم دی بنیادپرستی ای انتہاپسندانہ رویے دی کوئی گنجائش کائنی جو وی اینویں کریسی ریاست اوندے خلاف کاروائی کریسی۔ انہاں آکھیا جو خصوصی سرمایہ کاری سہولت کونسل دے پلیٹ فارم توں سعودی عرب ، متحدہ امارات سودھے ٻئی دنیا نال معدنیات ، آئی ٹی سودھے ٻئے شعبیاں اچ ارباں ڈالر دی سرمایہ کاری متوقع اے۔ ایں بارے دسمبر اچ اہم خبراں آسڳدن۔ غیرقانونی تارکین وطن کوں کݙھݨ بارے ہک سوال دے ولدے اچ انہاں آکھیا جو رجسٹرڈ افغان مہاجرین کوں کݙھݨ دی قطعی کوئی ڳالھ نی کیتی ڳئی۔ ایں بارے تاثر غلط اے۔ ݙوجھی کیٹیگری او غیر قانونی غیر ملکی ہن جنہاں دے پاسپورٹ اتے ویزے سودھے ٻئی کوئی قانونی دستاویز کائنی اتے معاشرے اچ انہاں دا کردار مبہم اے او اساݙے نظام اچ کائنی اتے ریاست دی حیثیت نال اساں چاہندوں جو او واپسی چلیے ونڄن۔ انہاں دا اتھ رہݨ دا کوئی اخلاقی تے قانونی جواز کائنی۔ ہک سوال دے ولدے اچ انہاں آکھیا جو عمران خان دی رہائی دا فیصلہ عدالت کرݨے اگر عدالت انہاں کوں چھڑیندی اے تاں او سیاسی عمل دا حصہ ہوسن۔ عدالتاں جو وی فیصلہ کریسن نگراں حکومت اوں تے عمل کریسی۔
