اسلام آباد۔9اگست(اے پی پی) وزیر تجارت جام کمال خان وزیر اعظم شہباز شریف دے رلے ایکسپو سینٹر کراچی اچ ’’فوڈ اے جی پاکستان 2024 ‘‘نمائش داباضابطہ طور تے افتتاح کیتا ۔ ایں موقع تے وفاقی وزیر تجارت آکھیے ٹریڈ ڈویلپمنٹ اتھارٹی آف پاکستان دے اہتمام نال تھیوݨ آلا اے پروگرام ملک دے زرعی شعبے سانڳے اہم سنگ میل ثابت تھیسی ، جیندے اچ 70 ملکاں توں 1000 توں ودھ مندوبین شرکت کریندے پئن ۔ اپݨی افتتاحی تقریر اچ انہاں وزیر اعظم دی موجودگی تے انھاں دا شکریہ ادا کیتا۔ انہاں آکھیے پاکستان دی زرعی برادری سانڳے حکومت دی غیر متزلزل حمایت جاری اے تے چاہندوں وختی اقتصادی حالات چنڳائی آلے پاسے ٹرن ، انہاں بین الاقوامی مہماناں دا وی پرتپاک استقبال کیتا جنہاں کاروباری موقع ڳولݨ تے پاکستان دی زرعی صلاحیتاں ݙیکھݨ سانڳے پوری دنیا توں پاکستان دا سفر کیتے ۔ وفاقی وزیر پاکستان دے زرعی شعبے دی ریکارڈ ساز کامیابیاں کوں اجاگر کیتے انہاں آکھیے چاول، امب ، نبو، وسل ، آلوں، مکئی اتے تل سودھے اہم فصلاں اچ بے مثال پیداوار ملی اے ۔ چاول دی پیداوار10 ملین ٹن تئیں پڄ ڳئی اے جݙاں جو امب تے نبو دی پیداوار بالترتیب 1.8 ملین اتے 2.3 ملین ٹن ریکارڈ تھئی اے، اے سنگ میل پاکستانی کساناں دی لڳن اتے محنت نال حکومت دی موثرزرعی پالیسیاں ݙکھیندی اے ،پاکستان دی زرعی برآمدات اچ ودھارا تھئے ، 23 ۔ 2022 اچ اے 5.8 ارب امریکی ڈالرتوں24 ۔ 2023 اچ 8 ارب امریکی ڈالرتئیں پڄ ڳئن جیڑھا 37.19 فیصد ودھارا اے ایویں چاول، تل تے مکئی دی برآمدات اچ بالترتیب 78.26فیصد ، 174.12فیصد ، تے 121.16فیصد ودھارا تھئے ۔ اے ودھارا پاکستان دی بین الاقوامی منڈیاں اچ مقابلہ کرݨ دی صلاحیت تے خوراک دی پیداواراچ اعلیٰ معیار برقرار رکھݨ دے عزم کوں ظاہر کریندے ۔ وفاقی وزیر پاکستانی برآمدات ودھاوݨ تے فوڈ اے جی نمائش کراوݨ اچ ٹی ڈی اے پی دے اہم کرداردی تعریف کیتی ، ٹی ڈی اے پی دنیا اچ اہم اسٹیک ہولڈرز کوں کٹھا کریندی اے ۔ اے تقریب بزنس ٹو بزنس میٹنگز، سیمینارز، اتے حکومتی ریگولیٹری اداریں اتے صنعت دے رہنماواں وچال براہ راست ڳالھ مہاڑ سانڳے انمول پلیٹ فارم ݙیندی اے ۔ اے نمائش نہ صرف پاکستان دے جدید تے قابل اعتماد فوڈ پراڈکٹس دی سپلائی چین دی نمائش کریسی بلکہ زرعی برآمدات مزید ودھاوݨ سانڳے نویں شراکت داریاں اتے اختراعی حل دے دروازے وی کھولیسی ۔ فوڈ اے جی پاکستان 2024 نمائش نویں موقع دا رستہ بݨیسی تے عالمی زرعی منڈی اچ پاکستان دی پوزیشن تکڑی کریسی ۔ انھاں بین الاقوامی کاروباری لوکاں کوں یقین ݙیوائے پاکستان اچ سورسنگ دے موقع ڳولݨ دا انھاں دا فیصلہ ملک دے پکے اتے مسابقتی سپلائی بیس پاروں ھک چنڳی کاروباری چوݨ اے ۔فوڈ اے جی پاکستان 2024 نمائش اڳلے ترائے ݙینھ تئیں جاری رہسی جیں اچ شرکاء کوں پاکستان دی زرعی صلاحیتاں اتے مستقبل اچ ترقی اتے تعاون دے امکان دا ھک جامع نظریہ پیش کیتا ویسی۔
