اسلام آباد – 01 نومبر (اي پي پي) مواصلات ۽ پوسٽل سروسز واري وفاقي وزير مراد سعيد چيو آهي ته مخالف ڌر لٽيل دولت تي اين آر او گهري رهي آهن ۽ پرڏيهي طاقتون پاڪستان کي غير مستحڪم ڪرڻ جون ڪوششون ڪري رهيون آهن، پاڪستان خوشحالي طرف گامزن آهي. پاڪستان اڳتي وڌندو ۽ دشمن جا ناپاڪ عزائم ناڪام ٿيندا، 27 فيبروري سڄي ملڪ جي جيت هئي. اها سمورين سياسي پارٽين ۽ محب وطن ماڻهن جي جيت هئي، ان ڏينهن دنيا ۾ مودي جي غرور کي خاڪ ۾ ملائي ڇڏيو ۽ پاڪستان جو قد اونچو ٿيو، ايندڙ ڀارتي نسل پاڪ فوج جي شاهينن جي ڪارنامن کي ڪڏهن فراموش نه ڪندو، پاڪ فوج جي شاهينن ڀارت جي مذموم عزائم کي خاڪ ۾ ملائي ڇڏيو. ڀارت جڏهن به جارحيت جي ڪوشش ڪئي پاڪستان ان کي ڀرپور جواب ڏنو ۽ ان جي ناپاڪ عزائم کي خاڪ ۾ ملائي ڇڏيو. اهڙن خيالن جو اظهار هن آچر تي پريس انفارميشن ڊيپارٽمنٽ (پي آئي ڊي) ۾ پريس ڪانرنس کي خطاب ڪندي ڪيو.
