اسلام آباد – 29 – سيپٽمبر (اي پي پي) وزيراعظم عمران خان چيو آهي ته پاڪستان جي ترقي لاءِ سمورن علائقن کي هڪجهڙي ترقي ڏيڻي پوندي، 70 سالن ۾ جن علائقن کي ترقي کان محروم رکيو ويو انهن کي مٿي کڻي اچڻ اسان جي حڪومت جي اولين ترجيح آهي، 2013ع ۾ ٺاهيل موٽر ويز جي لاڳت اڄ کان 20 ڪروڙ روپيا في ڪلوميٽر وڌيڪ هئي، ايف آءِ اي کي اهو اختيار ڏنو آهي ته هو اهڙن منصوبن جي جاچ ڪري، قوم جي سامهون اهڙا سمورا تفصيل آڻينداسين، پاڪستان جو سڀ کان وڏو مسئلو ڪرپشن آهي، وسيلن جي باوجود دنيا ۾ غريب ملڪن جي غربت جو بنيادي سبب اها ئي ڪرپشن آهي. هو بلوچستان ۾ جهل جائو – بيله شاهراهه جي بحالي ۽ اپ گريڊيسن منصوبي جي سنگ بنياد جي تقريب کي خطاب ڪري رهيو هو. ان موقعي تي بلوچستان جو وڏو وزير ڄام ڪمال، مواصلات وارو وفاقي وزير مراد سعيد به خطاب ڪيو. ان موقعي تي ڊپٽي اسپيڪر قاسم خانس وري به موجود هو. وزيراعظم عمران خان خطاب ڪندي چيو ته ن ليگ جي دور ۾ ٺهندڙ رستن جي ڀيٽ ۾ 20 ڪروڙ روپيا گهٽ لاڳت ۾ رستا ٺاهي رهيا آهيون، اڳوڻي دور ۾ رستن جي تعمير ۾ ڪرپشن جي جاچ جو چيو آهي، هن چيو ته ايف آءِ اي کي پورو مينڊيٽ ڏنو آهي ته هو جاچ ڪر حقيقتون عوام جي سامهون آڻي ۽ قومي سرمائي جي زيان جي ذميدارن جو تعين ڪري. وزيراعظم چيو ته جهل جائو – بيله شاهراهه بلوچستان جي مختلف علائقن کي ملائڻ جي لاءِ انتهائي اهم منصوبو آهي. وزيراعظم ان موقعي تي شرڪت ڪندڙن کي ٻڌايو ته اسڪول دور ۾ جڏهن هو تفريحي دوري تي هنزه ويو ته ان وقت ننڍن ننڍن ڳوٺن ۾ ماڻهن اسان جو والهاڻو استقبال ڪيو، اڄ شاهراهن جي ڪري اتي سياحت کي ايترو فروغ مليو آهي ته اتي گهرن ۾ به ماڻهن ڪمرا مسواڙ تي ڏيڻ شروع ڪري ڇڏيا آهن. اتي جون حالتون مڪمل تبديل ٿي چڪيون آهن، بلوچستان ۾ به شاهراههن تي انهي طرح جو ڌيان ڏنو وڃي ته هتي سياحت جا وسيع موقعا آهن، بلوچستان پاڪستان جي ڪل رقبي جو 40 سيڪڙو آهي، ان کي ماضي ۾ نظرانداز ڪيو ويو ڇو ته جيڪي حڪومتون پنهنجي مدي ۽ چونڊن کي نظر ۾ رکنديون آهن اهي بلوچستان جي ترقي ۾ دلچسپي وٺڻ بدران جتي سياسي فائدو وڌيڪ هجي اتي ترقي جي لاءِ قدم کڻنديون رهيون آهن. ان لاءِ بلوچستان پوئتي رهجي ويو. اسان جي حڪومت 70 سالن ۾ پوئتي رهج يويل علائقن کي ترقي ڏيڻ کي پنهنجي ترجيح بڻايو آهي، هن چيو ته چين سي پيڪ جي مغربي روٽ جو انتخاب ان لاءِ ڪيو ته مغربي چين ترقي جي عمل ۾ پوئتي رهجي ويو هو ان کي گوادر سان ملايو پيو وڃي، وزيراعظم چيو ته چين ڊگهي مدي واري حڪمت عملي اختيار ڪئي آهي، اسان به ان طرف وڃي رهيا آهيون. ملڪ ڊگهي مدي وارن منصوبن سان ئي ترقي جي راهه تي گامزن ٿيندا آهن، وزيراعظم چيو ته بلوچستان ۾ پسماندگي جا ذميوار هتان جا سياستدان به آهن جن جي سوچ صرف پنهنجي تڪ جي ترقي ۽ اليڪشن کٽڻ جي هئي، وزيراعظم چيو ته احساس پروگرام ۾ سنڌ ۾ اسان جي حڪومت نه هجڻ جي باوجود 34 سيڪڙو حصو سنڌ کي ڏنو ڇو ته اتي غربت جي شرح وڌيڪ آهي، اسان جي حڪومت جو ڌيان بلوچستان تي آهي، هتي شاهراهن جي پوري پاڪستان جي مقابلي ۾ سڀ کان وڌيڪ ضرورت آهي، اسان جي ڪوشش آهي ته جڏهن پنهنجو اسڪور ڪارڊ ڏيکاريون ته ان ۾ سڀ کان وڌيڪ ترقي بلوچستان ۾ هجي. وفاقي ۽ صوبائي حڪومتون گڏجي بلوچستان ۾ مثالي ترقي ڇڏي وينديون. وزيراعظم مراد سعيد ۽ سندس ٽيم کي خراج تحسين پيش ڪندي چيو ته رستا ٺاهڻ مشڪل ڪم نه آهي تنهن هوندي به گهٽ لاڳت تي معياري رستا ٺاهڻ ڪمال آهي، وزيراعظم عمران خان چيو ته پاڪستان جو سڀ کان وڏو مسئلو ڪرپشن آهي، ان مقصد جي لاءِ عوام جو پئسو ۽ ٽيڪس چوري ڪيو ويندو آهي، وسيلن جي باوجود دنيا ۾ جيڪي ملڪ پوئتي رهجي ويا آهن ان جو بنيادي سبب بدعنواني آهي جيڪي ملڪ خوش حال آهن اتي ڪرپشن نه آهي. وزيراعظم چيو ته اين ايڇ اي پاران ڏنل بريفنگ ۾ 2013ع ۾ ٺهندڙ رستن جي في ڪلو ميٽر لاڳت وڌيڪ هئي خاص طور تي اڄ جڏهن روپئي جي مقابلي ۾ ڊالر جي قيمت ۽ مهانگائي کي نظر ۾ رکيو وڃي ته 2013ع ۾ ايتري وڌيڪ لاڳت هجڻ ظلم آهي. ان مان ڪيترو پئسو بڻايو ويو، ان جي جاچ ڪري قوم جي سامهون آڻينداسين، ان ۾ ڪنهن ثبوت جي به ضرورت نه آهي. قوم کي ڪرپشن سبب ٿيندڙ نقصان کان آگاهه هجڻ گهرجي، ان رقم سان ڪيترائر ٻيا منصوبا مڪمل ٿي سگهيا ٿي جنهن سان محرومي جو خاتمو ممڪن هو.
