اسلام آباد۔21ستمبر(اے پی پی) پاکستان تے چین سانجھی ترقی اتے سکیورٹی کیتے تعاون کوں مزید ودھاوݨ کیتے پختہ عزم دا اظہارکیتے جݙاں جو نگراں وفاقی وزیر داخلہ سرفراز احمد بگٹی چینی ہم منصب کوں پاکستان اچ چینی باشندیں کوں فول پروف سکیورٹی ݙیوݨ دا یقین ݙیوائے۔ وزارت داخلہ توں جاری پریس ریلیز موجب نگراں وفاقی وزیر داخلہ سرفراز احمد بگٹی چینی ہم منصب وانگ ژاؤ ہانگ نال ملاقات کیتی ۔ ملاقات اچ انہاں پاکستان تے چین وچال سانجھی ترقی اتے سکیورٹی کیتے تعاون مزید ودھاوݨ کیتے پختہ عزم دا اظہار کیتے۔ وزیر داخلہ آکھیے پاکستانی وفد دے پرتپاک استقبال اتے مہمان نوازی تے چینی حکومت دا شکریہ ادا کریندوں ۔ انہاں آکھیے چین پاکستان دا آزمایا ہویا تے سدا بہار سٹرٹیجک دوست ملک اے ، چینی حکومت اتے عوام دی مختلف چیلنجز دے دوران پاکستان دی غیر مشروط حمایت قابل تحسین اے ۔ وزیر داخلہ چینی ہم منصب کوں پاکستان اچ چینی لوکاں کوں فول پروف سکیورٹی ݙیواݨ دا یقین وی ݙیوائے۔ سرفراز بگٹی پاکستان اچ مختلف منصوبیں تے کم کرݨ آلے چینی لوکاں کیتے سیکورٹی دا وی ݙسایا ۔ چینی وزیر پبلک سکیورٹی دہشت گردی اتے منشیات روکݨ کیتے حکومت پاکستان دے تکڑے عزم تے اقدامات دی تعریف کیتی ۔ وزیر داخلہ چیلنجز دے ادراک اتے انہاں تے قابو پاوݨ اچ مدد تے چینی ہم منصب دا شکریہ ادا کیتے ۔
