اسلام آباد۔27اکتوبر (اے پی پی):نگران وزیراعظم انوار الحق کاکڑ آکھیے جو بھارت 27اکتوبر1947 توں بھارتی غیرقانونی طور تے مقبوضہ جموں وکشمیر اچ آپݨا غاصبانہ قبضہ برقرار رکھیا ہویا اے ، کشمیریاں دیاں ترائے نسلاں دنیا خصوصاً اقوام متحدہ دے غیر جانبدارانہ استصواب رائے دے اپݨے وعدے کوں پورا کرݨ دا انتظار کریندی پئی اے ، عالمی برادری ہݨ آپݨی ذمہ واری توں اکھیں نی وٹا سڳدی ،بھارتی حکومت کوں 5 اگست 2019 دے یکطرفہ اتے غیر قانونی اقدامات کوں واپس گھنݨا چاہیدے ۔ نگران وزیراعظم انوار الحق کاکڑ 27 اکتوبر 2023 دے ݙینھ دی مناسبت نال ’’یوم سیاہ‘‘دے موقع تے آپݨے پیغام اچ آکھیے جو اڄ جموں و کشمیر دے وݙے حصے تے بھارت دے غاصبانہ قبضے کوں 76 سال تھی ڳئن ۔ 27 اکتوبر 1947 کوں بھارت پہلی واری آپݨیاں فوجاں کوں بھارتی غیر قانونی طور تے مقبوضہ جموں تے کشمیر اچ لاتھا ۔ اوں ݙینھ توں اڄ تئیں بھارت ایں علاقے تے زبردستی قبضہ جاری رکھیا ہویا اے ۔ انہاں آکھیے گزریل 76 سال اچ بھارت جموں و کشمیر تے آپݨی غیر قانونی حکمرانی کوں برقرار رکھݨ سانڳے مختلف ہتھکنڈے آزمائے ہن تاں جو، بھارت 5 اگست 2019 توں ھک مذموم مہم دا آغاز کر رکھیے جیں دے تحت کشمیریاں کوں انہاں دی آپݨی سرزمین اچ ججل بے اختیار کمیونٹی اچ بدالݨ دی گھناؤنی سازش زور تے ہے ۔ بھارت انہاں مذموم عزائم کوں عملی جامہ پواوݨ کیتے ٻہوں سارے اقدامات کیتن جیویں جو انتخابی حلقیں اچ ردوبدل، انتخابی فہرستاں اچ غیر کشمیریاں دا ودھارا ،کشمیر توں ٻاہر دے لوکاں کوں دھڑادھڑ ڈومیسائل سرٹیفکیٹ جاری کرݨ تے زمیناں تے جائیداداں دی ملکیت متعلق نویں قانون متعارف کراوݨ اے. اے غیر جمہوری اتے غیر قانونی اقدامات اقوام متحدہ دی سلامتی کونسل دی متعلقہ قرارداداں اتے چوتھے جنیوا کنونشن دی براہ راست خلاف ورزی ہن۔ وزیراعظم آکھیے اڄ کشمیر دنیا دا ھک ایجھا خطہ اے جتھاں ساریں توں ودھ قابض فوج تعینات اے، کشمیری عوام دے حقیقی نمائندے سالاں توں غیر معینہ مدت تئیں پابند سلاسل ہن، جبر کوں لکاݨ تے اختلاف رائے کوں دٻاوݨ کیتے میڈیا تے پابندیاں وݙے پیمانے تے مسلط کیتیاں ویندیاں پئن ۔ انہاں آکھیے گزریل ترائے ݙھاکیں توں ہزاراں بے گناہ کشمیری مرد، تریمتاں تے ٻال بھارتی بربریت دے ہتھوں اپݨی جانیں ونڄا ٻیٹھن تاں جو بھارت کشمیریاں دی حق خود ارادیت دی جدوجہد کوں دباوݨ اچ ناکام رہیے۔ وزیراعظم آکھیے پاکستان ہمیشہ وانڳوں اپݨے کشمیری بھراویں دے رلے کھڑے ، پاکستان کشمیریاں دے ناقابل تنسیخ حق خود ارادیت گھنݨ کیتے انہاں دی منصفانہ جدوجہد کیتے اپݨی مکمل اخلاقی، سفارتی اتے سیاسی حمایت جاری رکھیسی۔
