مظفرآباد – 13 اپريل (اي پي پي) وزيراعظم شاهد خاقان عباسي چيو آهي ته ڪم ڪندڙ شخص کي عدالتون سياست مان ڪڍي ڇڏين ٿيون، اها ملڪ جي بدقسمتي آهي جو ڪم ڪندڙن کي عدالتن ۾ گهليو وڃي ٿو، جنهن ملڪ ۾ سياسي اڳواڻن جي عزت نه ٿيندي اتي ترقي مشڪل آهي، عوام ايندڙ چونڊن ۾ جيڪو به فيصلو ڪري قبول آهي، ملڪ 65 سالن ۾ ايتري ترقي ناهي ڪئي جيتري گذريل 5 سالن ۾ ڪئي آهي، اسان رڳو ڳالهيون ناهن ڪيون پر ڪم ڪري ڏيکاريو آهي، اسان جي حڪومت مسئلا حل ڪرڻ ڄاڻي ٿي ۽ ڪري ڏيکاريا آهن، جيڪڏهن ماضي جي حڪومتون به پنهنجو ڪم ڪن ها ته ايترا مسئلا نه هجن ها، ڪنهن حڪومت 2 هزار ميگاواٽ بجلي پيدا نه ڪئي، اسان 10 هزار 400 ميگاواٽ بجلي پيدا ڪري ڏيکاري. هن اها ڳالهه نيلم جهلم منصوبي جي پهرين يونٽ جي افتتاح جي تقريب کي خطاب ڪندي چئي.
