گوادر ۔5جولائی (اے پی پی):وزیراعظم اڄ سنوار کوں گوادر دے دورہ دے دوران 2200 ایکڑ تے مشتمل گوادر پورٹ فری زون فیز ٹو دا سنگ بنیاد رکھیسن تے جنوبی بلوچستان کیتے 600 ارب روپے دے ترقیاتی پیکج تے عملدرآمد دے حوالے نال پیشرفت دا وی جائزہ گھنسن ، اے ڳال چیئرماین سی پیک اتھارٹی لیفٹیننٹ جنرل (ر) عاصم سلیم باجوہ وزیراعظم دے دورے دے حوالے نال ڳال مہاڑ کریندے ہوئیں ݙسائی اے ، انہاں آکھیے جو اڄ وزیراعظم گوادر آندے پئن جیڑھا جو تاریخی موقع اے۔ وزیر اعظم دے دورے دے دوران گوادرپورٹ فیز ون دی تکمیل دے بعد گوادر فری زون فیز ٹو دا سنگ بنیاد رکھیا ویسی اے ھک ٻہوں وݙا قدم اے ۔ فری زون دا فیز ون صرف 60 ایکڑ تے مشتمل ہئی جݙاں جو فیز ٹو 2200 ایکڑ تے مشتمل ہوسی ۔ انہاں ݙسایا جو وزیراعظم دورے دے دوران پنج فیکٹریاں دی تعمیر دا سنگ بنیاد وی رکھیسن ۔ گوادر شہر اتے جنوبی بلوچستان کیتے وزیراعظم 600 ارب روپے دا پیکج ݙتے انہاں ݙسایا جو اڄ تقریب اچ شنگھائی توں 7،8 وݙے سرمایہ کار آن لائن شرکت کریسن تے نہ صرف گوادر بلکہ پورے پاکستان اچ سرمایہ کاری دے منصوبیں دا اعلان کریسن۔ 7 علاقائی ملکاں دے سفیر وزیراعظم دی موجودگی اچ آپݨے آپݨے ملکاں ولوں سرمایہ کاری اچ شرکت دے حوالے نال اظہار خیال کریسن ۔
