اسلام آباد۔13دسمبر(اے پی پی):وزیر اطلاعات مریم اورنگزیب آکھیے نوازشریف دے پورے ملک کوں موٹر وے دے ذریعے رلاوݨ دے خواب دی تکمیل دا اڄ اہم ݙینھ اے۔ 306 کلومیٹر لمبی سکھر-حیدر آباد موٹروے M-6 دے سنگِ بنیاد دے بعد پشاور کراچی موٹروے (پی کے ایم ) دے آخری حصے دی تعمیر دے بعد پاکستان دے سارے وݙے اہم شہر موٹروے نال جڑ ویسن ۔ آپݨے ھک بیان اچ وفاقی وزیر مریم اورنگزیب آکھیے جو سرکاری اتے نجی شراکت داری نال ایم 6 کوں تعمیر کیتا ویندا پئے ، وزیراعظم شہباز شریف ایم 6 کوں 30 مہینے دی گھٹ مدت اچ مکمل کرݨ دی ہدایت کیتی اے ۔انہاں آکھیے منصوبے دی تکمیل نال پورے پاکستان دے عوام کوں جدید، آرام دہ سفری سہولتاں ملسن ۔ باربرداری اتے تجارتی نقل و حمل تیز تھیسی ، حادثیں توں بچݨ دے علاوہ جی ٹی روڈ تے ٹریفک گھٹ تھی ویسی ۔ وفاقی وزیر مریم اورنگزیب آکھیے بہترین شاہراہواں دی تعمیر نال ترقی دی نیشنل سپیڈ اچ ودھارا تھیسی جیں نال پاکستان دی معیشت تے چنڳے اثرات پوسن ۔منصوبے پورے تھیوݨ پاروں ملک اچ کاروباری سرگرمیاں ودھ ویسن ، تاجراں، صنعت کاراں اتے کساناں کوں آپݨی مصنوعات دی ترسیل اچ سوکھ تھیسی ۔
