اسلام آباد۔9جنوری (اے پی پی) نگران وزیراعظم انوار الحق کاکڑتعلیم، صحت اتے ٻئے شعبیاں اچ فلاحی منصوبیاں کیتے حکومت پاکستان ولوں یونیسیف کوں سارے سہولتاں ݙیوݨ دا اعادہ کریندیں ہوئیں آکھیا جو پسماندہ علاقیاں دے طلبا و طالبات کوں ٹیبلٹس نال جدید معلومات تئیں رسائی ݙیوݨ نال ناخواندگی ڳھٹ کیتی ونڄ سڳدی اے۔ وزیراعظم آفس دے میڈیا ونگ توں جاری بیان موجب اے ڳالھیں انہاں پاکستان اچ یونیسیف دے نمائندہ عبداللہ فاضل نال ڳالھ مہاڑ کریندیں ہوئیں آکھی جنہاں منگل کوں انہاں نال ملاقات کیتی۔ ملاقات اچ عبداللہ فاضل وزیراعظم کوں پاکستان دے کئی علاقیاں اچ یونیسیف دے اقدامات تے بریفنگ ݙتی جئیں اچ وزیراعظم کوں ݙسیا ڳئیا جو گزریل پنج سالیں اچ یونیسیف دے تحت پورے پاکستان اچ انسانی امداد، صاف پاݨی اتے غذا دی فراہمی،تعلیم اتے صحت دے ٻئے شعبیاں اچ تقریباً ہک ارب ڈالر دے منصوبے قائم کیتے ڳئن۔ نگران وزیراعظم عوامی فلاح و بہبود کیتے کئی کامیاب منصوبے قائم کرݨ تے یونیسیف پاکستان دی تعریف کیتی۔ انہاں آکھیا جو حکومت روزگار پیدا کرݨ دے منصوبیاں کیتے ہر ممکن سہولت ݙیسی۔
