اسلام آباد۔6اگست (اے پی پی):وزیر مملکت اطلاعات و نشریات فرخ حبیب آکھیے جو نواز شریف ڈھٹائی چھوڑن تے واپس آتے آپݨی سزاپوری کرن ،گزریل رات توں مسلم لیگ ن دی ساری قیادت دیاں نندراں اݙ ڳئن ،کامیاب جوان پروگرام ملکی معاشی ترقی اتے روزگار دے ودھارے دا ساریں توں وݙا پروگرام اے ، اے ڳال وزیر مملکت اطلاعات و نشریات فرخ حبیب جمعے کوں وزیراعظم دے معاون خصوصی امورنوجواناں عثمان ڈار دے رلے پریس کانفرنس توں خطاب کریندے ہوئیں آکھی اے ۔ فرخ حبیب آکھیے جو پاکستان توں سزایافتہ نواز شریف دیاں اپیلاں اتھاں مسترد تھئن تے سزا بحال تھئی اے ،ایکسپائرڈ پاسپورٹ دے نال او برطانیہ وچ بھگوڑے بݨ تے ٻیٹھن ، ملکی دولت لٹ تے ٻاہرلے ملک محل بݨائے ڳئن ، پاکستان توں لٹی ڳئی دولت توں ایون فیلڈ اچ محلات بݨائے ڳئن،ہݨ ایں ملک دی امیگریشن وی انہاں کوں لال جھنڈی ݙکھا ݙتی اے اتے آکھیے جو تساڈا اتھاں داݨا پاݨی مک ڳئے ،ٻہوں کافیاں پی ڳھدن،پیزے کھا ڳھدن ، ہائیڈ پارکس دی سیر کرڳھدی پولو میچز ݙیکھ ڳھدے ، انہاں آکھیے جو نوا زشریف کوں پاکستانی عدالتاں کرپشن تے سزاݙتی اے ݙوجھیں کوں کوڑے تھیوݨ دا طعنہ ݙیوݨ آلیں کوں پتہ ہووݨا چاہیدے جو پی ایم ایل این تاں کوڑ مارݨ دے رلڈ ریکارڈ قائم کرݙتن ۔
