اسلام آباد۔19جولائی(اے پی پی) وفاقی وزیر امور کشمیر و گلگت بلتستان تے وزارت سیفران انجینئر امیر مقام آکھیے حق خودارادیت سانڳے کشمیری پچھلے ست ݙھاکیں اچ لکھاں قربانیاں ݙے چکئن انہاں دی پاکستان نال جڑت لازوال اے،پاکستان نال کشمیریاں دی جڑت بھارت کہیں صورت ختم نی کرسڳدا ،شہدا دی سبز ہلالی پرچم اچ تدفین کشمیریاں دی پاکستان نال محبت دا ثبوت اے۔ کشمیر دے یوم الحاق پاکستان تے خصوصی سنھیے اچ وفاقی وزیر آکھیے اڄ دے ݙینھ 19 جولائی 1947 کوں غیور کشمیریاں پاکستان نال الحاق سانڳے سری نگر اچ قرارداد منظور کیتی۔انجینئر امیر مقام آکھیے حق خودارادیت سانڳے کشمیری ست ݙھاکیں اچ لکھاں قربانیاں پیش کرچکن ،کشمیریاں دی پاکستان نال جڑت لازوال اے۔وزیرامور کشمیرآکھیے پاکستان توں کشمیریاں دی تکڑی جڑت کوں بھارت کہیں صورت ختم نی کرسڳدا ۔انجینئر امیر مقام آکھیے کشمیری پاکستانی پرچم مقبوضہ کشمیر دی ہر ڳلی تے چنڈ تے لہریندن،حق خودارادیت تے الحاق پاکستان سانڳے کشمیری نینگر آپݨے وݙے وݙیریں وانڳوں پرعزم ہن ۔ کشمیریاں دے حق خودارادیت دے عزم کوں بھنݨ سانڳے بھارتی ہتھکنڈے ناکام تھیسن۔ پاکستان دنیا دے سارے فورمز تے کشمیریاں دی بھرپور حمایت جاری رکھیسی۔
