نیویارک۔24ستمبر (اے پی پی) وزیر دفاع خواجہ آصف آکھیے جو غزہ جھیں سانحے حل تھیوݨ تئیں ترقی ممکن نئیں، پاکستان ڄڳ کوں درپیش ترقی اتے سلامتی دے چیلنجز نال مقابلہ کرݨ کوں تیار اے۔ اے ڳالھ انہاں نیویارک اچ اقوام متحدہ دے فیوچر سمٹ نال خطاب اچ آکھی۔ انہاں آکھیا جو پائیدار ترقی کیتے غزہ ڄھیں سانحے حل کرݨے ہوسن، معاہدہ اوں ویلھے ہی تبدیلی ڳھن آ سڳسی ڄݙاں ایندے اچ کیتے گئے وعدے پورے کریڄن، ساݙیاں آوݨ آلیاں نسلاں اتے ڄڳ کیتے وݙے چیلنجز ہین جیندے نال نمٹݨ کیتے معاہدہ 100 توں ودھ ترقی پذیر ملکاں کیتے ہک موقع اے جو او ترقی دا سفر جاری رکھ سڳن، پائیدار ترقی دے اہداف (ایس ڈی جی) اتے 4 ہزار ارب ڈالر دا مالیاتی فرق پورا کرݨ کیتے ترقی پذیر ملکاں کوں امداد ݙیوݨ اتے قرض اخراجات ڳھٹاوݨ دا وعدہ پورا کرݨا ہوسی، بین الاقوامی مالیاتی اداریاں اچ ترقی پذیر ملکاں دی نمائندگی بہتر کیتی ونڄے، حکومتاں ولوں قرض دے ڈھانچے دا نویں سرو جائزہ ڳھن تے ایکوں ٻیا منصفانہ ٻݨا تے منصفانہ بین الاقوامی ٹیکس نظام اپنایا ونڄے۔ وزیر دفاع آکھیے جو ترقی پذیر ممالک کوں ترجیحی حقوق ݙتے ونڄن، ماحولیاتی تحفظ دے ناں تے پابندیاں نا لایاں ونڄن، ڈیجیٹل ترقی دی ونݙ مکاوݨ ہر کہیں کیتے ہکو سویں مستقبل دی کنجی اے۔
