لاهور – 12 ڊسمبر (اي پي پي) اطلاعات ۽ نشريات واري وفاقي وزير چوڌري فواد حسين چيو آهي ته اليڪشن ڪميشن پهرين مرحلي ۾ وڏين سياسي پارٽين جي فنڊنگ جا معاملا عوام آڏو رکي، (ن) ليگ ۽ پيپلزپارٽي وٽ فنڊنگ جو ڪو رڪارڊ موجود نه آهي، (ن) ليگ جو 2013ع ۽ 2015ع تائين جڏهن ته پيپلزپارٽي جو 2009ع کان 2012ع تائين فنڊنگ جو رڪارڊ ئي دستياب نه آهي، نواز شريف 2013ع ۾ 10 ڪروڙ رپيا (ن) ليگ کي عطيو ڪيا، ان رقم مان 4 ڪروڙ 50 لک رپيا (ن) ليگ نواز شريف کي واپس موڪلي ڇڏيا، بنيادي طور تي (ن) ليگ جي اڪائونٽ کي ڪارو ڌن سفيد ڪرڻ جي لاءِ استعمال ڪيو ويو، ٽي ايل پي ۽ جي يو آءِ جي فنڊنگ جي حوالي سان پڻ اعتراض موجود آهن، پيپلزپارٽي جو اليڪشن وڙهڻ تي پري جي ڳالهه آهي پنجاب ۾ ان جي ٽڪيٽ وٺڻ لاءِ به ڪير تيار نه آهي، وزيراعظم گوادر ۾ ريلي جي عوامي مطالبن جو نوٽيس ورتو آهي، وزيراعظم عمران خان بلوچستان جي مسئلن جو حل ترجيحي بنيادن تي چاهي ٿو. اهڙن خيالن جو اظهار هن پريس ڪانفرنس کي خطاب ڪندي ڪيو. ان موقعي تي اطلاعات وارو مملڪتي وزير فرخ حبيب پڻ موجود هو. چوڌري فواد حسين چيو ته وزيراعظم گوادر ۾ ريلي جي عوامي مطالبن جو نوٽيس ورتو آهي، وزيراعظم عمران خان بلوچستان جي مسئلن جو حل ترجيحي بنيادن تي چاهي ٿو. هن چيو ته وزيراعظم بلوچستان جي لاءِ 700 ارب رپين جو تاريخي پئڪيج ڏنو، ايران جي سرحد تي واپاري صورتحال جهڙا مسئلا به درپيش آهن، افغانستان جي صورتحال کانپوءِ اسان سمورين سرحدن تي سيڪيورٽي سخت ڪئي جنهن جي ڪري مقامي ضرورتن جي حوالي سان پڻ مسئلا پيدا ٿيا، اسان کي انهن مسئلن جو احساس آهي. هن چيو ته بدقسمتي سان ماضي جي حڪومتن گوادر جي بندرگاهه تي ڳالهه ته ڪئي پر بنيادي مسئلن تي ڪو ڌيان نه ڏنو، پاڻي ۽ بجلي جهڙن منصوبن ۾ دير ٿي ۽ اتي احساس محرومي پيدا ٿي. چوڌري فواد حسين چيو ته وزيراعظم بلوچستان جي حڪومت ۽ لاڳاپيل ادارن سان مسئلن تي ڳالهه ڪئي آهي، انشاءَ الله مسئلا جلد حل ڪيا ويندا. هن چيو ته گوادر ۾ اڪثر مقامي ماڻهن جا مسئلا آهن، غيرقانوني فشنگ جي معاملي جو پڻ سختي سان نوٽيس ورتو آهي، انهن معاملن کي هڪ پاليسي تحت اڳتي کڻي هلنداسين. اليڪشن ڪميشن ۾ فارن فنڊنگ جي حوالي سان ڳالهائيندي اطلاعات واري وفاقي وزير چيو ته اسان اليڪشن ڪميشن کي مضبوط ڪرڻ چاهيون ٿا، اليڪشن ڪميشن ۾ فارن فنڊنگ جي ڪيسز ۾ اڳڀرائي اهڙي طرح نه ٿي رهي آهي جهڙي طرح ٿيڻ گهرجي، اليڪشن ڪميشن ۾ رجسٽرڊ سياسي پارٽين جي فنڊنگ جا معاملا اوپن ٿيڻ گهرجن. هن چيو ته پاڪستان ۾ جمهوريت کي ان وقت فروغ ملندو جڏهن سياسي پارٽين جو پنهنجو اسٽرڪچر هوندو ۽ انهن جي فنڊنگ جو نظام اوپن هوندو. اطلاعات واري وفاقي وزير چيو ته ڪيتريون ئي شدت پسند پارٽيون به اليڪشن ڪميشن سان رجسٽرڊ آهن جن جي فنڊنگ جا ذريعا موجود ئي نه آهن. اطلاعات واري وفاقي وزير چيو ته ٽنهي وڏين سياسي پارٽين جا آڊٽ اڪائونٽس اليڪشن ڪميشن وٽ موجود آهن، انهن کي عوام جي سامهون پيش ڪرڻ گهرجي. هن ٻڌايو ته (ن) ليگ جي نالي تي ايف سيون ٿري ۾ موجود گهر جي قيمت ٻه ڪروڙ 70 لک رپيا ٻڌائي وئي آهي، ايف سيون ٿري ۾ گهرن جي قيمت کان جيڪي ماڻهو آگاهه آهن انهن کي خبر آهي ته ان قيمت ۾ فٽ پاٿ به نه ملي. ان گهر جي قيمت جي حوالي سان به ڪو ثبوت موجود نه آهي ته اها رقم ڪٿان آئي. هن چيو ته 2013ع ۾ (ن) ليگ جي اڪائونٽ ۾ 14 ڪروڙ 50 لک ۽ 8 ڪروڙ 67 لک رپين جي رقم آئي، انهن رقمن جي به خبر نه آهي ته نواز شريف کي اهي ڪنهن موڪليون. چوڌري فواد حسين چيو ته عمران خان پارٽي ۾ جيڪو نظام قائم ڪيو ان ۾ اوورسيز پاڪستانين اسان کي رقم موڪلي، ان ۾ اهڙي رقم به شامل آهي جيڪا هڪ ڊالر کان 10 ڊالر جي وچ ۾ آهي. (ن) ليگ وٽ پنهنجي ڊونر جو رڪارڊ موجود نه آهي، (ن) ليگ وٽ اسلام آباد ۾ 20 – ايڇ گهٽيءَ نمبر 10 ايف ايٽ ٿري ۾ پنهنجي آفيس بابت به رڪارڊ موجود نه آهي ته ان آفيس جو ڪرايو ڪير ادا ڪري رهيو آهي. ان آفيس بابت (ن) ليگ اليڪشن ڪميشن کي ٻڌايو آهي ته اها آفيس انهن جي آهي پر ڪيئن هلي رهي آهي ان جي ڪا خبر نه آهي. اطلاعات واري وفاقي وزير چيو ته پنجاب ۾ (ن) ليگ جو 2013ع کان 2015ع تائين ڪو آڊٽ رڪارڊ موجود نه آهي، 2011ع کان پوڻا ٻه ڪروڙ رپين جي لڳ ڀڳ رقم (ن) ليگ جي اڪائونٽ ۾ موجود آهي، خبر نه آهي اها رقم ڪنهن جمع ڪرائي. هن چيو ته نواز شريف 2013ع ۾ 10 ڪروڙ رپيا (ن) ليگ کي عطيو ڪيا، ان رقم مان 4 ڪروڙ 50 لک رپيا (ن) ليگ نواز شريف کي واپس موڪلي ڇڏيا، بنيادي طور تي (ن) ليگ جي اڪائونٽ کي ڪارو ڌن سفيد ڪرڻ جي لاءِ استعمال ڪيو ويو. هن چيو ته لنڊن ۾ قائم هڪ ڪمپني (ن) ليگ جي لاءِ پئسو جمع ڪري رهي آهي ان جو به حساب ڪتاب موجود نه آهي. هن چيو ته پيپلزپارٽي جو 2009ع کان 2012ع تائين فنڊنگ جو رڪارڊ ئي دستياب نه آهي، 2013ع ۾ هڪ سورس اڪائونٽ اوپن ڪيو ۽ ان ۾ 42 ڪروڙ رپيا جمع ڪرايا ويا پر اليڪشن ڪميشن کي نه ٻڌايو ويو ته اهو پئسو ڪٿان آيو. هن چيو ته پيپلزپارٽي جي اڪائونٽ ۾ مئي 2013ع، 2014ع ۽ 2015ع ۾ ترتيبوار 25 لک، 36 لک ۽ 35 لک جي رقم آئي جن جو ڪو رڪارڊ نه آهي ته ڪٿان آئي آهي. 2013ع جي اليڪشن ۾ پيپلزپارٽي 23 ڪروڙ رپين جا خرچ ظاهر ڪيا پر ان فنڊ جو سورس دستياب نه آهي. هن چيو ته پي پي پي ۽ پي پي پي پي (چار پي) جا معاملا تمام دلچسپ آهن. پي پي پي پي آمريڪا ۾ هڪ ڪمپني رجسٽرڊ ڪرائي، ان ڪمپني جي ذريعي ان وقت جي پاڪستاني سفير حسين حقاني پيپلزپارٽي جي لاءِ فنڊ جمع ڪرڻ شروع ڪيا، ان ڪمپني لکين رپين جا فنڊ گڏ ڪيا پر ان جو ڪو سورس رڪارڊ موجود نه آهي. هن چيو ته ٽي ايل پي ۽ جي يو آءِ جي فنڊنگ بابت به اعتراض موجود آهن، ٽي ايل پي جي فنڊنگ جو ته ڪو پتو ئي نه آهي ته ڪٿان کان آئي ۽ ڪٿان وئي. چوڌري فواد حسين چيو ته اليڪشن ڪميشن پيپلزپارٽي، (ن) ليگ ۽ پي ٽي آءِ جي فنڊنگ جي معاملن کانپوءِ ٻئي مرحلي ۾ ٻين پارٽين جي فنڊنگ جا معاملا به اوپن ڪري ته جيئن ماڻهو ڀيٽ ڪري سگهن ته ڪير صحيح ۽ ڪير غلط آهي. هن چيو ته پنجاب ۾ نئين بلدياتي نظام تي پنجاب حڪومت مبارڪباد جي مستحق آهي، پهريون ڀيرو خيبرپختونخواهه ۽ پنجاب ۾ بااختيار حڪومت هوندي. هن چيو ته سنڌ جي وڏي وزير مراد علي شاهه جي غيرت فريال ٽالپر جي پرس کڻڻ تي نه ٿي جاڳي، هر ڳالهه تي ڌمڪي ڏيڻ اهي پنهنجو فرض سمجهن ٿا، مراد علي شاهه جو رويو غيرمناسب آهي، سنڌ حڪومت جيڪو نظام ڏنو آهي اهو واضح طور تي آرٽيڪل 140 اي جي خلاف ورزي آهي. پنجاب ۽ خيبرپختونخواهه ۾ اختيار ۽ وسيلا هيٺئين سطح تي منتقل ٿيندا، 18 هين ترميم کانپوءِ خيال هو ته اين ايف سي ايوارڊ جا پئسا صوبن کي ويندا ۽ صوبن کان ضلعي هيڊڪوارٽرز کي منتقل ٿيندا پر صوبن ڪڏهن اهي پئسا نه ڏنا، شهباز شريف اقتدار ۾ ايندي ئي بلدياتي حڪومتن جو نظام ختم ڪري ڇڏيو. هن چيو ته هاڻي پنجاب ۾ پهريون ڀيرو ضلعن ۾ ميئر جي سڌوسنئون اليڪشن ٿيندي، ميئر پنهنجي ڪابينا نامزد ڪندو، هاڻي اين ايف سي جو پئسو صوبن ۾ اچي ضلعن وٽ ويندو، هي اهو نظام آهي جنهن جو وزيراعظم عمران خان واعدو ڪيو هو. اطلاعات واري وفاقي وزير چيو ته وزيراعظم پارٽي جي اندر مخالفتن جي باوجود پنهنجو واعدو پورو ڪيو آهي، ضلعي جو ميئر سڌوسنئون چونڊجندو، هڪ تمام وڏي انتظامي ۽ سياسي تبديلي ايندي. اطلاعات واري وفاقي وزير چيو ته اليڪشن ڪميشن جهڙي قسم جي اي وي ايم مشين چاهي ٿي ان جو ٽينڊر ڪري ڇڏي، دنيا ۾ اي وي ايم مينوفيڪچرر پنهنجون مشينون کڻي ايندا، اليڪشن ڪميشن کي سنجيدگي سان اڳتي وڌڻ جي ضرورت آهي، اليڪشن ڪميشن جون ٽيڪنيڪل ڪميٽيون مثبت اڳڀرائي آهي. هڪ سوال جي جواب ۾ اطلاعات واري وفاقي وزير چيو ته مسلسل ٽئين هفتي مهانگائي ۾ گهٽتائي اچي رهي آهي، خطي ۾ تيل جون قيمتون سڀ کان سستيون آهن، ڪڻڪ ۽ دالين جا اگهه به خطي ۾ پاڪستان ۾ سڀ کان گهٽ آهن، رڳو چانهه جي پتيءَ جي قيمت هتي وڌيڪ آهي. هن چيو ته آبادگارن کي هن سال 400 ارب رپيا اضافي آمدني ٿي، ماڻهن جي قوت خريد ۾ اضافو ٿيو آهي، وچولي طبقي جي صحت جا خرچ حڪومت کڻي ڇڏيا آهن، ميڊيا ماڻهن کي اصل صورتحال کان آگاهه ڪري. هن چيو ته بنگلاديش، سريلنڪا ۽ خطي جي ٻين ملڪن جي مقابلي ۾ هتي قيمتون گهٽ آهن ۽ قوت خريد وڌيڪ آهي. هن چيو ته قانون جي ڳالهه ڪئي وڃي ته پارليامينٽ حتمي فيصلو ڪندي آهي، تشريح جو معاملو هجي ته سپريم ڪورٽ جو فيصلو حتمي هوندو آهي، جيستائين قانون موجود آهي ان وقت تائين راءِ تي نه ٿو هلي سگهجي. اي پي ايس سانحي جي حوالي سان سوال تي اطلاعات واري وفاقي وزير چيو ته اي پي ايس سانحي جي ڏوهارين کي گرفتار ڪري سزائون ڏنيون ويون آهن. اي پي ايس سانحي ۾ ملوث ڏوهارين حضرت علي، عبدالسلام، سبيل ۽ مجي کي 2 ڊسمبر 2015ع تي ڦاهي ٿي، ڏوهاري رضوان کي 24 مئي 2017ع تي ڦاهي ٿي، ڏوهاري عتيق جي نظرثاني جي درخواست سپريم ڪورٽ ۾ التوا هيٺ آهي. هن چيو ته اسان جو موقف واضح آهي ته جيڪو پاڪستان جي آئين ۽ قانون کي مڃي هلندو اسان ان سان گڏ هلنداسين. هڪ ٻئي سوال جي جواب ۾ هن چيو ته پيپلزپارٽي کي آصف زرداري وڏي محنت سان تباهه ڪيو آهي، بينظير ڀٽو کي چئني صوبن جي زنجير چيو ويندو هو، آصف علي زرداري ڀٽو جي سياسي فلسفي کي تباهه ڪرڻ ۾ اهم ڪردار ادا ڪيو. هن چيو ته پيپلزپارٽي جو اليڪشن وڙهڻ ته پري جي ڳالهه آهي پنجاب ۾ انهن جي ٽڪيٽ وٺڻ لاءِ به ڪير تيار نه آهي، راجا پرويز اشرف ۽ يوسف رضا گيلاني پيپلزپارٽي جي ٽڪيٽ کانسواءِ اليڪشن وڙهي ته ان کي وڌيڪ ووٽ ملندا. هن چيو ته حڪومت ڪيسن سان ناهي ويندي حڪومت ووٽن سان ويندي ۽ ايندي آهي، مقامي حڪومتن جي چونڊن ۾ سمورين پارٽين کي موقعو ملندو، جنهن ۾ جيترو دم آهي اهو اچي ڏيکاري. هن چيو ته پي ٽي آءِ کانسواءِ ڪنهن پارٽي وٽ چونڊن ۾ اليڪشن وڙهڻ جي لاءِ اميدوار ئي پورا نه آهن، عمران خان جو پوري ملڪ ۾ ووٽ بئنڪ آهي، عمران خان جو ڪردار بي مثال آهي. هڪ ٻئي سوال تي هن چيو ته ان ڳالهه تي سڀ متفق آهن ته پاڪستان ۾ اليڪشن جو نظام صحيح نه آهي، جڏهن اسان سڌارن جو پئڪيج آندو ته مخالف ڌر ان تي ڳالهه ڪرڻ لاءِ تيار نه آهي، عمران خان واحد ليڊر آهي جيڪو ڪرڪيٽ جي اندر نيوٽرل امپائر آندو، عمران خان چونڊ عمل کي شفاف ۽ منصفاڻو بڻائڻ چاهي ٿو.
